„აშშ-ში ქართული ღვინის ექსპორტის მზარდი დინამიკა შესაძლოა, შეფერხდეს“
<p>დონალდ ტრამპის ადმინისტრაციის მიერ დაწესებულმა ტარიფებმა აშშ-ში ქართული ღვინის ექსპორტის მზარდი დინამიკა შესაძლოა, შეაფერხოს, - ამის შესახებ აღნიშნულია „თიბისი კაპიტალის“ ანალიზში.</p>
<p>გასულ კვირას აშშ-მა სხვა ქვეყნებთან ერთად, 10%-იანი ტარიფები დაუწესა საქართველოს სხვადასხვა პროდუქციაზე, მათ შორის კი არის ღვინო. „თბს კაპიტალის“ თანახმად, დაწესებული ტარიფები გავლენას იქონიებს ქართული ღვინის ექსპორტზე.</p>
<p>„2024 წელს, აშშ-ის წილმა საქართველოს ღვინის ექსპორტში 2.6% შეადგინა და მე-6 ადგილი დაიკავა. ამავე პერიოდში ერთი ლიტრი ქართული ღვინის საშუალო საექსპორტო ფასი აშშ-ში 6 დოლარი იყო, რაც 2-ჯერ აღემატება საშუალო საექსპორტო ფასს (2.9 დოლარი). ეს შესაძლოა, მიუთითებდეს, რომ ქართული ღვინო აშშ-ის ბაზარზე მაღალი საფასო სეგმენტზე პოზიციონირდება.</p>
<div class="ad-component" data-position="inside_article">
<div class="ad">
<div id="adoceanadvertlinegeqgitjxpsde"></div>
</div>
</div>
<p>აშშ-ის მიერ იმპორტზე დაწესებული ტარიფები რისკს უქმნის ბოლო წლებში აშშ-ის ბაზრებზე ქართული ღვინის ექსპორტის მზარდი ტენდენციის გაგრძელებას და შესაძლოა, შეაფერხოს ეს დინამიკა.</p>
<p>მსგავსი ტიპის ტარიფების დაწესება, როგორც წესი, სრულად აისახება სამომხმარებლო ფასებში და ტარიფის ტვირთიც მომხმარებელზე გადადის. მეორე მხრივ, რადგან აშშ-ში ექსპორტირებული ქართული ღვინო უკვე მაღალ საფასო სეგმენტს წარმოადგენს, შესაძლოა, მომხმარებელი ნაკლებად მგრძნობიარე აღმოჩნდეს ფასების ცვლილების მიმართ“, - აღნიშნულია „თიბისი კაპიტალის“ ანალიზში.</p>
<p>შეგახსენებთ, აშშ-ის პრეზიდენტმა დონალდ ტრამპმა გასულ კვირას ახალი ტარიფების დაწესების შესახებ განაცხადა. ახალი სატარიფო პოლიტიკის ფარგლებში, ყველა სავაჭრო პარტნიორი ქვეყნისთვის აქამდე დაწესებულ იმპორტის გადასახადს საბაზისოდ დაემატა საქონლის ღირებულების 10% (საბაზისო ტარიფი). თუმცა, დაახლოებით სამოცამდე ქვეყნისთვის იმპორტის გადასახადი აღემატება საბაზისო დანამატს.</p>
<p>აღსანიშნავია ისიც, რომ ტრამპის განკარგულება მოიცავს გამონაკლისი პროდუქტების სიასაც, რომელსაც დამატებითი იმპორტის გადასახადი არ შეეხება. დამატებითი 10%-იანი საბაზისო იმპორტის გადასახადი ძალაში 2025 წლის 5 აპრილიდან შევიდა.</p>